صاحب مصنع الحلويات اكل شقاء العمال
بمناسبة اللي بيحصل في مطعم عيش وملح.. أنا كنت شغال في المجال دا من فترة، وعارف الظلم اللي الناس بتشوفه. خصوصاً بقى في الأعياد وفي أيام رمضان، وخميس وجمعة.. الناس بتحط تحت ضغط رهيب بيوصل إن الناس بتحس بالقهر الشديد، عشان ما حدش بيحس بيهم.
فأنا عايز أتكلم على واقعة حصلت في أشهر مصنع حلويات في مصر؛ صاحبه راجل غني جداً وعنده شركات وحاجات في الإعلام والكلام ده كله (مش ينفع أقول اسمه عشان ما أتحبسش تمام؟).
عايز أقول إن المصنع ده شغال فيه أكتر من ألف أو ألفين عامل، والناس دي المفروض إن بيجيلهم بونص كل فترة عشان هما بيتعبوا وتعبهم جامد جداً. فالراجل ده كل فترة بيسرقهم بينصب عليهم وما بيديهومش البونص دوت. فجه شهر الناس تعبت فيه، والناس شغالة سنين وسنين، وما نزلش البونص.
حصلت حاجة زي "روبن هود".. شخص ما قرر إن هو ياخد حقه فينتقم. فعمل إيه؟ اقتحم الإدارة بتاعت المصنع (الإدارة لازقة في المكان بشكل ما مش عارف أوضحه برضه). هو طلع ودخل على المكاتب الإدارية، تقريباً دخل على الشؤون المالية، وسرق فلوس وسرق لابتوب
الغريب في الموضوع إنه كتب على الحيط أو في مكان واضح: "البقية سوف تأتي".. يعني هو مش هيسكت أو هيعمل حاجات تانية، وبعد كده هرب.
المصنع اتصدم شوية وسكتوا وما بلغوش الشرطة على طول، وبعد كده بلغوا الشرطة. فالشرطة اكتشفت بصمة غريبة، بس رغم كده ما عرفوش يجيبوا الفاعل.
ومش بس كده.. رجعوا حارس أمن! واضح إن حارس الأمن دا كان بيقعد فوق في الإدارة أو حاجة زي كده ومعاه سلاح، وهما مشوه عشان يوفروا ثمن الراجل. فبعد كده ندموا ورجعوه تاني.
مش بس كده كمان.. دول نزلوا البونص للناس! وعشان كده الناس فرحت وشافت الراجل ده روبن هود، وإنه بطل، وإنه أخد اللابتوب عشان المعلومات اللي فيه.
ولحد دلوقتي على فكرة ما حدش عارف مين الشخص .. بس هو الراجل ده مش حرامي بالفطرة، هو مش حرامي أصلا، بس هو كان عاوز ياخد حقه. بس كده.
ملحوظة: صاحب المصنع ده سبَّ الدين للعمال لأنهم كانوا بيطالبوا بحقهم."
تعليقات
إرسال تعليق